我與特奧會

2007年4月28日

使者名人錄

香港雖然細,但明星、政要多的是,想見佢哋嘅辦法有大約四種,一係你追星,二係偶然情況下遇到,三係明星親自嚟踩場,四係你有機會喺一次活動中見到佢,當然我亦唔例外,不過我並唔鍾意追星,亦都唔係時常遇到,所以我攞出嚟「曬命」嘅人物全部都係後面兩種情況。

政要篇:


1.  前港督彭定康 (1993年)
呢幅雖然唔係合照,但當年佢嘅出現的確係學校一件大事,事關嗰次有各大傳媒爭相追訪,而當時仲係讀小學嘅我亦有幸代表節奏樂組表演,表演後,佢仲親自行到台前試玩敲擊樂器呢!



2.  立法會議員張文光 (1999年)
單係睇獎牌就知道我地當時係向嘉賓「曬」啲獎牌出嚟啦!(講笑啫
) 事實上我對嗰次嘅印象都唔深,只是記得剛剛完咗「特殊奧運會夏季世界比賽」後返嚟無耐,不過啲獎牌真係好「墜」條頸!



3.  前教育統籌局常任秘書長羅范椒芬 (2000年)
如果我唔講呢個係被捲入教院風波嘅羅太的話,單睇佢側面你會覺得似邊個呢?因為當時我要備戰2000年傷殘奧運要停學一段時間,所以我哋都係抽時間返學校見佢,圖中可以見到我著得幾隨便。



4.  前教育統籌局局長張建宗 (2001年)
呢個係我第一次需要事前準備嘅迎賓活動,嗰次係將一段介紹學校嘅演講詞背熟 (正式嚟講係貓紙),到咗當日張建宗參觀校舍後,進入家政室與老師及家教會成員會面,當然我都在場啦!到我介紹學校嘅時候,突然有啲段落我忘記咗,於是攞番張貓紙出嚟讀,介紹完後仲講咗一句:「我只係準備咗幾日咋。」雖然佢本人就唔介意,而且仲話唔太鍾意舞龍舞獅夾道歡迎,但嗰次就變成咗別人嘅笑柄。



5.  民政事務局局長何志平 (2004年)
呢張相都算係近期嘅經典之一,當時我以展能精英運動員基金委員身分出席,除咗佢之外,前行政長官董建華都有出席,不過仲走得快過何局長,好彩都可以同佢影相。
歌影視紅星篇:



1.  鄭伊健 (1996/97年)
呢個算唔算係學校與歌星第一次合作呢?當時係為港台節目「大陽計劃開幕禮」中表演節奏樂,歌名係「在森林和原野」,表演前幾日,佢連同唱片公司職員一同到校觀看我哋練習,為當晚表演做好準備,我見到佢嘅第一個感覺係:「佢真係好高啊!」有啲老師仲攞CD出嚟叫佢簽名留念,嗰次嘅合作成為咗學校其中一個經典場面。



2.  鄭秀文
無諗到我識跳舞哩,嗰次只係咁啱Sammi喺同一個場合中表演,加上我哋要求下,造就咗呢幅合照。


3.  張瑪莉 (1998年)
75年香港小姐張瑪莉是也!當年學校第一次同捷旅假期合作展開澳洲之旅,張瑪莉亦跟隨同行,她相當友善親切,一啲都唔「作撞」,加上導遊嘅親切帶領下,令整個旅程充滿著歡樂嘅氣氛。


4.  方力申 (2004年)
話哂方力申都曾經係港隊泳手,有關體育嘅活動當然全力支持啦!直至現時為止已經喺不同場合中見過四次,包括呢張參加「賽馬會第三屆智障人士世界游泳錦標賽」嘅合照。


5.  馬俊偉 (2004年)
因為於03年曾經參加過北京考察團嘅原故,所以每年嘅體育界慶祝國慶晚會都會預埋我哋一份,04年馬俊偉為晚會獻唱一曲,會後我當然唔執輸,同佢影咗呢張合照!


6.  阿諾舒華辛力加 (2005年)
呢張相非常珍貴!直至現時為止,於名人錄中最Top嘅一位巨星,縱使佢嘅工作非常繁忙,仍樂意抽空出席探望我們,我們熱情咁歡迎他,他亦很熱情咁向每一位運動員握手同傾計,雖然只是十多分鐘,但是仍覺非常難得。



7.  林子祥 (2006年)
當晚林子祥為公司春茗擔任嘉賓,擅長攪氣氛嘅阿Lam一出場,令全場氣氛推至最高潮!同熱情如火嘅同事們打成一片!


8.  呂方 (2007年)
相比起阿Lam,呂方嘅做法似乎保守咗啲,一直企喺台上唔落嚟,呢張相都係我主動上台同佢合照,但睇佢個樣似乎唔多願意咁喎!(只係當時佢正在唱歌啫)
除咗呢啲之外,仲有一啲名人都曾經同我合照,不過最後始終搵唔到,唯有「曬」住咁多先啦!
但相信有人會比我見過更多名人呢!

3 則留言:

  1. 嘩! 嘩! 嘩! 好羨慕呀! 真係比你曬親呀!

    回覆刪除
  2. 好厲害呀 !為你感到光榮 。

    回覆刪除