我與特奧會

2008年3月20日

屈臣氏集團春茗




一年一度公司春茗又嚟啦!

公司春茗係我現時參加過嘅春茗中最好玩嘅一個,除咗有豐富獎品外,仲有歌星表演,精彩嘅遊戲節目等等,都令人樂而忘返。





登記之後,每位同事都有一盒朱古力做「見面禮」,不過呢盒朱古力已經俾我嗰隻「蝗蟲」大哥喺兩日內食哂,另外仲有三個籌碼用來玩「拋磚引玉」嘅遊戲。




呢個遊戲就好似以前荔園那些用金幣擲階磚一樣,只要中咗有圖案嗰格就會有獎,我都有一次中圖案,獎品係二哥最鍾意麥提莎一盒,返到屋企後二哥見到盒麥提莎就兩眼發光,喺十五分鐘內食哂,仲要話:「咳都要食!」

今年嘅春茗分開兩日進行,目的係可以坐得舒服啲,不過出席呢日春茗嘅同事比較靜啲,所以入席後,大老闆黎先生就過嚟我哋Group PR嗰圍,叫我哋今日要攪興個氣氛。







黎先生上台致歡迎詞同祝酒後,正式開始進宴啦!連上乳豬併盤都咁有排場,問你死未!




食到大慨第三道菜,就開始抽枱獎,不過今次就唔係用抽獎形式,而係每人如果能夠將手上的圖案紙摺成下面兩幅圖咁樣,就可以攞走枱面上三份獎品,其中一份係當晚先有,仲係黎先生私人出錢買嚟做獎品,呢樣就係原唱歌曲CD,主唱者仲喺當晚現場獻唱呢!







全場其中一個焦點就係Tery,當司儀叫佢講出公司「六個核心價值」其中一個嘅時候,佢棯一棯,之後話:「我老闆。」好精景嘅一個答案。

跟住一個跳舞遊戲環節,Tery代表全枱Group PR嘅同事出嚟玩,我哋係咁起勢為Tery打氣,佢就玩到殺入最後三強,最後由大老闆判定由Tery勝出,我哋全枱都有利是一封。辛苦錢真係得來不易啊!

第二個全場焦點就係香港第一位女變臉師傅嘅表演,我哋就落足眼力睇睇成個變臉過程有什麼破綻,有些時間佢仲走到台下表演,當走到我哋嗰枱時,老孟就叫佢:「變臉啦!」但佢唔係省油嘅燈,始終無近距離變臉俾我哋睇,所以好難睇到破綻,呢啲就係「國粹」嘅精彩地方,不過好可惜,呢次我忘記咗影俾大家睇。




今次嘅星級名人嘉賓就係 ─ 羅敏莊是也!雖然話吸引力並不及前兩年林子祥同呂方咁大,但係攪氣氛方面好過呂方多多聲!







大家都喺場中間玩到樂而忘返,好玩到羅敏莊都要唱多一首先落台,我都跳到成身都慶哂!




最後一個高潮就係抽大獎!中間嗰部電腦就係用嚟抽獎,獎品非常豐富,包括高清電視、參茸海味套裝、女裝手袋、手提電腦、數碼攝影機等,電腦下面嗰雙手同個頭係老孟,而我哋正喺到叫著:「Group PR!」希望有同事中獎,不過最後大部份都係俾咗Group Finace同Group IT嘅人中獎,我哋就無一個人中獎,似乎欠咗啲抽獎運喎!

臨走前,大老闆主動過來同我哋影合照,之後Malina仲介紹我俾大老闆認識,我就不忙向大老闆遞上我張全球友好使者嘅咭片,趁機介紹一下自己,而家至少起碼佢認識我,對我將來都有幫助。

有關春茗嘅相暫時只有呢啲,放完復活節假期之後會再放多啲相上嚟!密切留意!

2 則留言:

  1. I also enjoy at that night and be the dancer of table 10, but Tery's dance is better than me, so he won.
    [版主回覆03/24/2008 12:30:00]不過上次睇你玩遊戲嘅時候好認真吓喎!

    回覆刪除
  2. 好開嘅一晚!

    [版主回覆03/24/2008 12:32:00]嗰晚真係好開心,差啲叫到失哂聲!

    回覆刪除