我與特奧會

2008年6月8日

小事幾則

好耐都無分享喺我身邊發生嘅小事喇,就嚟講一講啦!


有關WAC:
  • 最近比較多日子要請WAC運動員到公司幫手,因為今年暑期班嘅報名已經開始,陸陸續續會有不少報名表送到公司,所以通常都係幫手處理報名。

  • 阿昇和Marina有兩日時間公咗印尼嘅亞青田徑賽,呢兩日係我最關鍵嘅日子,因為要處理「香港城市田徑錦標賽」嘅報名,而且呢個比賽嘅處理方式與一般比賽不同,所以喺阿昇走之前一定要問佢點樣處理最好。
有關SO

  • 如果各位網友有睇我嗰篇美國遊記嘅話,應該會記得Kester想邀請我參加喺三藩市舉行嘅渡海泳比賽吧,返到香港之後嘅兩個星期內,Kester已經向大會方面作出了行動,為免令佢繼續期待落去,不如就快啲搵Michael同SAM會職員馬Sir作出決定,經過我哋嘅時間、重要性同風險等等考慮之後,決定回答Kester一句:「因為工作關係,我決定不出席了。」

  • 特奧東亞區職員張Sir(即係以前SAM會職員兼我嘅前指導老師)想搵我喺7月舉行嘅《特奧東亞區游泳比賽》期間幫健康運動員計劃嘅攤位內做小記者,雖然仲係初步構思階段,但對於剛剛成為游泳技術小組成員嘅我嚟講,睇吓個比賽運作相信會更加重要吧!

  • Michael想我喺「香港運動教學會」入面(Michael係會長,我係其中一名「理事仔」)嘅「學前兒童家長會康樂小組委員會」上做啲嘢,至於我要有乜準備?真係要得閒好好問清楚Michael先得啦!

有關自己:
  • 早前兩日因為橫生智慧齒嘅位置痛得我要命,令我無覺好瞓!最近食咗兩劑必理痛,叫做好好多,本年我約咗牙科診所嘅林醫生7月6日脫智慧齒,但為咗唔想再拖落去,想約早啲,不過林醫生早極都要6月30日,唯有改約同診所另一位醫生幫我做啦!就算請半日假都冇計架啦!

  • 婆婆生日嗰晚,我同阿媽去「萬寧」買嘢,見到有鼻舒樂售賣,於是買一盒試試,事關我哋一家都係「超級鼻鼾一族」!呢兩日試用之後,我個人認為幾好用,好明顯擴張咗我嘅鼻道呼吸。

分享到呢度為止,各位晚安!

4 則留言:

  1. 你貼咗嗰塊鼻貼之後,有咩嘢感覺?會唔會好涼?有無藥味?係咪要日日用嫁?
     
    [版主回覆06/09/2008 23:51:00]呢隻鼻貼並無任何藥味,貼上去之後兩邊鼻孔好明顯拉闊咗,但是因為噚日又牙痛令我無覺好瞓,試唔真個功效係咪顯著。
    我而家都係日日用佢,基本上產品包裝都有建議你用幾多日。

    回覆刪除
  2. 唔該晒!因為我好怕聞薄荷味,所以無氣味嘅話,我會考慮試吓 ,不過,有一個問題要克服,就係貼咗鼻貼之後,個樣會好funny ,我見到林曉峰個樣就忍唔住笑 ,我驚會笑到瞓唔到 ‥‥哈‥‥哈‥‥哈!
    [版主回覆06/10/2008 22:48:00]係林曉峰做得浮跨啫!

    回覆刪除
  3. 牙痛真係慘過大病 ...
    [版主回覆06/10/2008 22:46:00]所以長痛不如短痛。

    回覆刪除
  4. 我都要買返盒鼻貼俾謙爸用先得!
    [版主回覆06/13/2008 22:07:00]萬寧同屈臣氏都有得買架!

    回覆刪除