我與特奧會

2008年10月20日

按摩鬆一鬆

今日我攞咗全日補假休息,下晝阿媽帶埋我一齊去按摩鬆一鬆,我就選擇咗推拿兩節(每節45分鐘),阿媽就選擇按腳同按肩各一節。

講起按摩呢樣野,以前做運動員嘅時候有體院獎學金計劃,於是我每個星期都享用佢哋嘅按摩服務,最少每星期一次,不過自從退咗役之後就一直都無做過按摩,可想而知啲肌肉有幾緊。

無做按摩三年,不知不覺間自己嘅身體已經發出咗警號,按摩師一按就已經話我全身都好緊同肌肉腫脹,尤其係膊頭同小腿位置,當按摩師按到嗰啲位置嘅時候,痛到我嗌哂救命,不過按完之後就真係鬆咗唔少,全程300蚊都唔駛,值門票價!

轉個話題,講吓我嘅活動同工作,呢個星期WAC只係準備越野賽、一啲比賽報名同下個月Annual Dinner嘅野,唔算太忙但好多濕碎野做,過咗Annual Dinner一個星期後,我就會用公司年假去海南島出席《特殊奧運會東亞區運動員代表大會暨青少年之友冬令營》(←個名真長),而家暫時知道自己要做演說,詳細內容要遲啲先知,不過呢次Michael或者會因事去唔到,所以現時係邊個同我一齊去都未知,但首先要做嘅就係搵Michael傾吓個Speech點寫最好。

3 則留言:

  1. 你的工餘時間一直都好繁忙充實,好有意義。好期待你介紹海南島的活動。
    放鬆身體肌肉,你有沒有試過做水療?不過香港跟教練都幾貴。我家嫲嫲都有做,加拿大的阿姨囘港時教她的做的(聽講在加拿大跟教練做水療是免費的),嫲嫲宜家隔天就去城門谷泳池自己做,她就講好有效,見她好enjoy這項運動。
    [版主回覆10/21/2008 22:11:00]多謝你的介紹。

    回覆刪除
  2. 上班一族肌肉崩緊好常見,唯有喺放假日子盡量去放鬆吓,同媽咪去按摩都係一個好好嘅親子活動(雖然你已經咁大個仔喇),健康無價,使少少錢有人幫你放鬆,都係值得嘅!
    [版主回覆10/23/2008 13:27:00]絕對值得!
    今日朝早返工特別精神!

    回覆刪除
  3. 工作辛苦疲累,難得可以抽時間輕鬆按摩,讓綳緊的肌肉得到鬆馳,身心也舒暢呀!
    [版主回覆10/23/2008 22:53:00]今日早上起身的感覺都特別舒服。

    回覆刪除