我與特奧會

2009年7月22日

計劃一個人旅行

其實我一直都想今年去旅遊散心,皆因全球友好使者任期結束後應該唔會有太多外地特奧活動要去。雖然台灣、泰國、馬來西亞等都未去過,但都仲係想去日本,最初想去北海道,但最後都係決定9月中一個人去東京,點解?

原因一:亞洲青少年傷殘人士運動會

「亞洲青少年傷殘人士運動會」將於9月11日至13日喺日本東京舉行,到時HKSAP同HKSAM將會組成香港隊參賽,呢個亦係我決定呢次旅行時間同地點嘅最大原因,到時去玩樂嘅同時,更加可以親身去賽場幫香港隊打氣!(不過仲未知駛唔駛入場費)

有關資料可以瀏覽呢個網址:http://www.tokyo2009.jp/

原因二:探老豆

因為老豆而家仲喺日本工作,所以過去探吓佢係理所當然啦!原本稔住喺佢間員工宿舍度住,慳番啲Book酒店錢,但係佢工作嘅地方 - 相模原 (JR橫濱線‧根岸線終點站八王子之前第五個站)與主要旅遊點相距甚遠,所以已經打消咗呢個念頭。

原因三:要清假

過咗暑期班之後,除了10月係本地田徑賽及長跑比賽高峰期、公司搞升中講座同周年聚餐嗰段時間會較多嘢做外,應該唔會有大Project要做,所以呢個時候就開始清咁啲年假,以免同同事喺年尾爭放假日子,不過呢次日本東京之旅是否成行,就要睇上司批唔批我放假喇!

而家已經開始Plan緊自己嘅行程、機票、酒店等,曾經去過多間旅行社格價,結論係:一個人比兩個人去貴好多!所以決定機票同酒店分開Book,咁啱Blog友哥羅殘、Kelvin兄同Carson媽都寫緊日本東京遊記,佢哋嘅資料對我嘅旅程計劃有一定嘅參考作用,最後決定國泰機票(因為有優惠) + 昌庭之家(哥羅殘推介) + 藍十字保險 (上網投保有9折) 呢個自選計劃,埋單5000蚊多啲,其實有啲酒店或民宿嘅價錢比昌庭平,但穩陣起見都係昌庭好啲,當上司批咗假之後,就會第一時間行動!不過求神拜佛,唔好Book咗機票之後先嚟話特奧嗰邊要我去日本或者9月出國參加活動至好。

沒有留言:

張貼留言