我與特奧會

2009年9月22日

日本東京一人之旅 Chapter 1.2 - 昌庭之家,傳說中的C6出口!



10-9-09 (東京 - 成田機場2號大樓 → 日暮里 → 池袋)

日本時間下午兩點幾到達東京成田機場2號大樓,一出閘就見到大大隻簡體中文字寫著「日本歡迎您」的橫額。

喺過海關期間,遇見同機嘅SAP會主席馮太,不過冇打招呼,因為我唔想打擾佢。

跟著攞完行李,就排隊等保安檢查,進行時個海關用佢嗰啲「唔鹹唔淡」嘅英文問我呢次嚟東京係咪嚟公幹,聽到我一頭霧水,最後佢用筆寫「Busniess」喺隻手度先明白佢講乜。

過咗保安檢查後就踏入大堂範圍,第一件事就係買火車票,原本我想選擇較舒適嘅Skyliner,不過到達嘅時候要隔兩班京成本線嘅火車先有一班,所以索性淨係買較平嘅京成本線車票,再喺隔離Counter用600yen買一張東京Metro一日乘車證,至於用嚟做乜嘢?而家俾啲時間大家估吓,遲啲再話你知。



攪掂哂所有嘢之後,就喺機場第2號大樓呢個站乘坐京成本線去日暮里站。



我乘坐嘅京成本線特急.......



1小時15分鐘車程後來到日暮里站,再轉JR山手線前往池袋。


如果各位好似我咁拖住個行李箱到升降機門口附近時要十分小心,因為呢部升降機同列車路軌中間只有一條幾窄嘅通道,而且升降機門前嘅空間較細,遇著人多嘅話就要俾多少少耐性同忍讓一下,免生意外。


大約十幾分鐘車程之後,嚟到池袋站,真正嘅考驗而家先至開始!因為而家就要去搵今次嘅住宿地 - 昌庭之家。

由於池袋係大站,連接東京Metro有樂町線、丸之內線、副都心線、JR線、西武池袋線同西武東上線等列車路線,而且附近仲有東武百貨同西武百貨等大量商舖連繫埋一齊,所以真實環境同自己嘅計劃相比差好遠,不過今日時間多的是,況且之後都係休息一陣再喺附近行吓就算,總之安全至上!


其實昌庭之家係Blog友哥羅殘介紹嘅,主要係因為貪佢係台灣人民宿會較容易溝通同交通方便,喺昌庭之家嘅網站所講嘅C6出口其實係喺東京Metro沿線嗰邊,如果喺JR線嗰邊行嘅話就要睇住嘅指示牌,見有「西口方面」同埋「有樂町線」或者「丸之內線」嘅字眼就跟住佢行,直至見到麥當勞個指示牌就行落樓梯,就會見到上圖呢條地下街,行入地下街後就會見到C6出口。


不過我就比呢幅地圖中嗰個紅色箭咀欺騙咗.......



仲令我行錯咗呢個6號出口。



原本喺C6出口上電梯一出去,就見到住友銀行,只要沿住出口方面條路一直行,過埋「YU!」彈珠機店舖之後轉左,然後沿路行入去小路就去到,不過我喺6號出口行過去,原本都唔知行邊度,但對面嗰間麥當勞成為咗我嘅指引明燈,於是攞住上面呢張地圖,沿住佢嘅指示一路搵......



大樹後面嗰座大廈就係住友銀行,一見到佢就心諗:「差唔多到喇!」

喺地圖嘅指引下,終於都嚟到昌庭之家喇!整個過程用咗大約半個鐘。



今次我住嘅房間位於地下一間單人房,雖則係單人房,但係就有兩張床,如果想樫錢又唔介意地方細住兩個人都唔錯。

雖然佢只係一間民宿,但係基本設備齊全,仲有電視、免費無線上網等(呢樣先係重點)。



成間房最特別嘅係呢個流動式洗手盆,當沖涼嘅時候就可以將佢移去馬桶嗰度。



如果想去大小二便嘅時候又可以將個洗手盆移開。



成間房最滿意嘅係廁所,尤其係呢度有按掣式嘅洗頭水同沖涼液供應,好過大酒店嗰啲「懶係型」嘅細細支裝沖涼用品,如果係咁不如用自己帶嚟嗰啲好過,不過今次就一滴都冇用到。



沖完涼,換好衫安頓好之後就出去食晚飯兼買一啲所需用品,當中嘅過程請留意下一篇。

5 則留言:

  1. 太神奇喇個廁所!
    [版主回覆09/25/2009 13:16:00]我都係第一次見。

    回覆刪除
  2. 你好叻,我去到池袋都亂哂籠
    個廁所好得意呀~
    [版主回覆09/25/2009 13:15:00]池袋都好啲,新宿仲亂呀!

    回覆刪除
  3. 一人之旅也很特別!
    [版主回覆09/26/2009 11:09:00]不用左顧右盼,不用煩!

    回覆刪除
  4. 日本什麼都小小的,但好玩呀!
    [版主回覆09/26/2009 17:20:00]日本真是個多元化的地方。

    回覆刪除
  5. 個廁所又幾得意喎!
    [版主回覆09/28/2009 15:58:00]麻雀雖小但五臟俱全。

    回覆刪除