我與特奧會

2009年10月30日

日本東京一人之旅 Chapter 2.3 - 由原宿行到涉谷 (下)

11-9-09 (東京 - 涉谷)

原宿同涉谷相當近,雖然有JR同東京Metro搭,但係為咗樫錢,於是就行路過去。



行咗大約15分鐘,見到東京Metro涉谷站,即係話去到目的地啦!


喺日本,當蕩失路嘅時候,搵吓附近有無鐵路站,如果有就不妨行入去,因為裏面有地圖,指示最近目的地嘅出口。



車站內貼上了東京申辦2016年奧運嘅海報,不過結果係點大家都知啦!



見到バチ公嘅壁畫



同埋呢個バチ公銅像,代表我已經到達咗涉谷站バチ公口嘅範圍。



呢度仲有一架古老電車.......



入到去會發現呢個係展示由昔日到現在車站變化相片嘅博物館,裏面仲有得坐,行到攰嘅時候可以嚟hea吓,我都喺呢度hea咗幾次。



9月防災月嘅海報,之前成日都話日本東京喺9月會有大地震,不過到現在11月都未有地震。



涉谷係一處Shopping嘅好地方,而且到處高樓都有大電視,就好似行緊銅鑼灣咁旺。



涉谷109,主要賣女性時裝,我都喺度打咗個「白鴿轉」,一向唔太鍾意Shopping嘅我行咗4層左右就出返嚟。



呢間賣電器同電子產品,算係有啲興趣,不過呢類產品香港比較平。



呢條街附近有間HMV,我去咗行一陣。



喺香港都好少有人咁樣賣廣告喇掛。



喺日本竟然有小肥羊火鍋店?日後喺日本搞特奧活動嘅時候可以介紹俾啲中國代表。



不過最重要嘅目的......都係呢個 - 一蘭拉麵。



入座前先選購食物,然後在呢啲一格格嘅座位就座,認真夠哂私隱。



呢度可以自選心水口味,只要填妥呢張表格,然後交俾服務員就得喇。



呢枝筷子套都係MANU之一,既環保又實用,當「唔夠候」嘅時候可以用佢嚟點嘢食。



我除咗叫拉麵外,仲叫咗水煮蛋,味道好過香港多多聲,仲有圖示教你點撕蛋殼,認真細心。



當然不得不提呢碗「主角」出場啦!味道冇之前「無敵家」嗰啲咁濃味,但仍然係一流嘅味道!

遊完涉谷,下一站就係去探老豆!不過前往途中有一件事發生咗,究竟係乜嘢事?下回再續!

1 則留言:

  1. 見到碗麵就流口水啦~
    [版主回覆11/01/2009 22:12:00]的確係一流!

    回覆刪除