我與特奧會

2009年12月5日

日本東京一人之旅 Chapter 2.4 - 小田急奇遇記

11-9-09 (東京 - 涉谷 → 新宿 → 町田→相模原)

又繼續擱置咗好耐嘅「日本東京一人之旅」遊記......

上回講到,遊完涉谷後,就向相模原出發!



首先乘坐JR山手線前往新宿。



到達後再轉小田急線往町田。



因為町田呢個站離新宿好遠,坐「快速急行」嘅列車都要半個鐘以上,不過呢個已經係最快捷同最平嘅選擇,如果坐JR線往八王子轉車去相模原,車費會貴一倍有多。


到達町田站之後,首先就同老豆報平安,不過當時我唔知道打佢手機前面要有0字,所以打唔通,唯有打去佢間舖頭講聲到咗町田嘅消息俾佢個同事聽啦。


呢度令我諗起港鐵荃灣站附近嘅道路。


喺日本,通街都有呢啲賣彩票嘅舖頭仔。


行到呢度先發現,我個背包唔見咗,於是急急腳返到小田急線車站報失。


嚟到報失中心,就向站內職員報失,因為職員唔識英文,所以要加上身體語言以及寫字,佢先至明白,不過整個過程我係異常地冷靜,或者係我啲重要錢財、身份証、護照等等都喺個腰包度帶住有關。

辦好手續後,佢叫我下午4點鐘返嚟,但係冇理由等佢咁耐架嘛!於是3點45分就返咗嚟,果然收到好消息,話個袋已經搵返,不過就要去到小田原站攞。跟住個職員就俾個電話我同嗰度嘅職員通話,但聽佢喺度「嘰呢咕嚕」都唔知佢講乜,嗰度都擾攘咗一陣,跟住嗰位小田原站嘅職員竟然同我講普通話!我就話:「你早說嘛!不要讓我那麽辛苦跟你通話!」

通過電話後,報失中心職員俾咗一張通行証俾我過去小田原站攞返個袋,雖然最後都能夠攞番個袋,但係由町田到小田原來回已經浪費咗我個半鐘!中間仲要坐錯車,又浪費咗我一啲時間,打電話俾老豆又打唔到,令我開始擔心老豆一直喺相模原站等我,然後老豆見唔到我就打俾阿媽,又令阿媽擔心!呢次亦提醒我下次去日本一定要租手機,方便我打出打入。

攞番個袋之後,就返去町田站坐JR線前往相模原。



幾經辛苦!終於都嚟到啦!不過到達嘅時候,老豆已經唔喺度。梗係啦!叫人地等咁耐,鬼等你咩!況且佢呢個時候已經返去開工,唯有又要靠自己啦!






1 則留言: