我與特奧會

2009年12月5日

日本東京一人之旅 Chapter 2.5 - 探老豆@珍味樓 + 夜遊新宿

11-9-09 (東京 - 相模原 → 町田 → 新宿)



上次唔記得咗介紹吓相模原嘅地理位置添,今次補番!

相模原係位於東京西部,鄰近八王子,比橫濱再遠少少。

其實呢個地方屬於小鎮,比較靜,人唔多,就算我老豆做嘢嘅位置位於全市最旺嘅地段,人流仍然都係少。



老豆工作嘅地方 - 珍味樓。



老豆嘅同事們,佢哋都好鍾意我送來嘅月餅啊!



登登登櫈!老豆出場啦!



難得聚頭,梗係影番張合照啦!原本可以多啲時間同佢傾計,但係一個「失袋事件」浪費咗好多時間,所以今次只能短聚啊!



跟住老豆帶我上去佢間宿舍睇吓個環境,其實佢一個住嚟講算好大架啦!



佢瞓覺嘅地方同茶几,茶几上嘅電腦書係我買俾佢嘅。

雖然話佢做嗰間係中菜館,但係佢話如果係中國人去日本嘅話就唔好食中國菜,所以佢俾咗兩個選擇:拉麵同印度咖哩,但因為今日下晝同噚晚都食過拉麵,所以最後選擇咗後者,味道不過不失啦!好過無得食!

同老豆Say Goodbye之後,就沿舊路線返去新宿行番陣先!



到達新宿站,一出閘口就係南面出口,連選擇嘅機會都冇。

喺南口出面有擺賣拉麵嘅街檔,不過我食咗嘢,暫時同佢無緣,下次先啦!



我嚟嘅目的只係行吓激安店,同埋感受一下呢度嘅氣氛,不過新宿呢個地方真係好大,唔似之前涉谷、原宿嗰啲咁易行,所以行到中途都要坐都營地鐵到新宿西口。

越接近歌舞伎町,啲燈光就越多,人流就越旺!



啲街道越睇就越似旺角,都係咁旺!五光十色。



終於都到達激安店啦!呢度真係夜遊人士嘅好去處,你諗到嗰啲幾乎都可以喺呢度買到!如果你唔貪名牌嘅話,我建議你買波鞋,貴則幾百蚊,平則一百蚊都唔駛,係咪好抵呢!不過我最後都無買到嘢,只係周圍行吓。



激安店隔離,就係著名嘅「歌舞伎町一番街」!有不少外國人都鍾意嚟呢度飲吓酒,吹吓水,原本都好想深入啲去睇吓,不過嚟到嘅時候都已經係晚上十點幾喇,加上呢度真係好雜!乜嘢人都有,所以只係行咗一陣就走啦。



走嘅時候都要搵吓邊條路可以返JR新宿站,不過因為太夜,部份通往新宿站嘅地下街已經關閉。正當我為回程苦惱嘅時候,就喺歌舞伎町附近有一大堆人群向著同一個方向,於是就跟著呢堆人群過去,最後行吓行吓,發現原來喺歌舞伎町附近有個JR新宿站出口,跟住我心諗:「總之就唔駛搵得咁辛苦啦!搵到我腳痺!(下刪埋怨 + 粗口共200字!)」但都係嗰句:「喺南口出閘係無得俾我揀。」

最後就乘坐JR山手線返酒店,不過今日實在行得太多,左腳第四隻腳趾已經起咗一粒波子咁大嘅水疱,右腳趾頭亦有一粒細嘅水疱,再加上腳部肌肉酸痛,非常影響我嘅活動能力,但聽日要早起身,因為要去築地食壽司!












沒有留言:

張貼留言