我與特奧會

2009年12月16日

日本東京一人之旅 Chapter 3.1 - 壽司大‧四小時

12-9-09 (東京 - 池袋 → 築地)



今日早上5點就起身,目的就係去築地魚市場食壽司!

大家仲記唔記得我到達東京機場嘅時候買咗呢張東京Metro一日乘車券呢?唔記得?唔緊要,今日就用佢周遊東京Metro沿線嘅景點。

雖然話好心急想快啲去到築地,但係噚日嘅腳部酸痛加上腳趾嗰兩粒水疱令行動力大減,所以今日嘅行程會採取「多休息,行動慢」嘅策略!




首先從池袋坐東京Metro有樂町線轉日比谷線往築地站。

到達築地後,就搵築地魚市場嘅位置,搵到後再入去尋找今日早上嘅目標 - 壽司大!

呢間咁出名嘅店舖,之前Blog友哥羅殘又食過,Kelvin Lau又食過、甚至連Carson媽都食過,佢哋個個都讚好!今次我就要慕名而來,睇吓佢有乜嘢過人之處先!



早上6點45分嚟到壽司大嘅門口,一見門口嘅人龍唔係好多啫,跟著上圖白色衫嗰位大叔話比我知......


原來龍尾喺呢度先真,我心諗:「頂多咪排兩個鐘頭。」

不過有批外國遊客傾計時聽到,要入去食就要等四個鐘頭!我當堂O哂嘴!

但為咗可以食到美味嘅壽司,我就接受呢次挑戰!

第一小時:

喺呢一個小時內條長龍係郁都冇郁過,但係奇怪地係冇人放棄等候......



第二小時:

等候嘅人開始有啲攰,開始有人喺有得坐嘅牌坐底。我就更加唔駛講,中途有少少肚餓,於是從我個袋中攞出蘋果嚟食。大部份嚟嘅都係三四個人一齊嚟,所以有啲人趁等候期間分批出去行其他地方,留底一兩個嚟守候。喺呢一個小時內,只係有一兩個行到入去舖前位置,但放棄等候嘅人仍然係一個都冇。



第三小時:

到咗第三個小時,入到舖前位置嘅人只有幾個,不過呢個時候突然落雨,無帶雨傘嘅人(包括我)都顯得非常狼狽,但嗰位白衫大叔非常好心,預備咗雨傘俾我哋,喺呢一刻我更加肯定呢次一定要嚟食到佢哋嘅壽司。



第四小時:

等咗咁耐,終於都可以入到舖前啦!啲人越近個門口,等越好奇望一望舖內嘅情況。跟著呢間舖嘅侍應就為每一位客人點菜,呢度有兩種選擇,分別係2400yen同3900yen套餐,我當然係要3900yen嗰個啦!


幾經辛苦!終於都可以入去品嚐啦!



店內嘅師父十分好客,逐件壽司都介紹俾我知,仲教我邊樣唔駛點豉油,而且佢仲識講廣東話呢!



平時唔食薑嘅我,今次都試吓呢度啲酸薑。



呢碗湯入口淡淡鮮味,淡淡惹味!



頂級靚Toro!入口甘香可口!



海蝦壽司,一樣係鮮味無比!



海膽壽司,十分好味道,香港嗰啲完全無得比!



自選壽司方面,我就選擇咗赤貝,因為呢10件壽司裏面貝類比較少,當師父將壽司擺喺面前嘅時候,個赤貝仲係郁嘅!可想而知有幾新鮮。

總結嚟講,一流嘅服務,一流嘅壽司,真係值門票價!

食先咁好味嘅壽司後,見仲係咁大雨,就走去雜貨店買咗把雨傘,跟住就慢慢行出魚市場,向著地鐵站進發!



不過沿途有唔少特色食物售賣,我都買咗一啲魚絲魚乾等返香港請同事食。



當然仲有新鮮海產賣啦!



玉子燒喺呢度都好出名,售賣嘅店舖都唔少。



呢度係築地場外市場,一樣咁熱鬧,仲有啲人企喺度食拉麵,別有一番風味!



行完築地後,就坐地鐵向淺草進發!

4 則留言:

  1. 你真係好有耐性,等足四個鐘,我就一早放棄啦!
    [版主回覆12/17/2009 23:06:00]當時見有大把時間,等耐啲都唔怕啦!

    回覆刪除
  2. 先生好!聖誕快樂!
    [版主回覆12/18/2009 15:47:00]Marry X'mas!

    回覆刪除
  3. merry X'mas
    [版主回覆12/18/2009 17:02:00]u2!

    回覆刪除
  4. 壽司大如此有魅力, 那麽多人無懼風雨 .......你當日的見聞很有趣
    [版主回覆12/18/2009 18:04:00]四小時的確可以看到很多有趣的事情。

    回覆刪除