我與特奧會

2009年12月18日

日本東京一人之旅 Chapter 3.3 - 香港隊!你好嗎?

12-9-09 (東京- 淺草 → 辰巳)



喺淺草食過好味嘅天婦羅之後,就坐地鐵前往辰巳國際水泳場睇游泳比賽。上次去喺國立代代木體育場嘅乒乓球比賽,氣氛欠奉,唔知今次去睇游泳比賽嘅情況又係點呢?



前往途中經過公園,鳥語花香,十分舒服。



同上次睇乒乓球比賽一樣,越接近場館裏面就越緊張,尤其今次係「遠洋」探泳隊隊友,更多咗兩分緊張。


入到場館裏面,就見到「日本蛙王」北島康介打破200米蛙式世界紀錄嘅海報。


再睇睇觀眾席嘅情況,氣氛比乒乓球比賽場地好得多!


跟住我就搵吓香港隊嘅身處位置,果然真係搵到,於是就靜靜雞坐底。

而SAM會職員區姑娘當時就坐喺我前面,當時機成熟,我就拍吓區姑娘嘅膊頭,跟住區姑娘一轉身望到我,都令佢驚喜萬分!因為事前冇乜SAM會嘅職員知道我去日本,知道我特意嚟探佢哋嘅人更加係少之又少!跟住區姑娘打咗個電話俾剛剛去咗田徑場地嘅何小姐同凌校長,而我都同佢哋通話咗一陣,何小姐問我去唔去選手村探隊友,當時我就以之後有行程為理由拒絕咗 (但如果答應咗嘅話,可能唔會遇到返池袋時發生嘅事);之後凌校長話佢會坐14號5點幾嘅飛機返去,咁啱我又係坐呢班機,於是就約咗我喺飛機上見。

跟住識我嗰啲泳隊成員如棨麟、翠芬、陳正等等都開始逐一打聲招呼,新嘅如陳煒天就好好認識一下。



同我合照呢位就係「靚仔一號」棨麟喇,佢有啲以前容偉業嘅影子,又係高大威猛嗰隻!佢噚日就為港隊奪得一面銅牌!


講返游泳比賽嘅實況先!



呢次比賽項目分為兩個部份,第一部份係國際傷殘奧委會(IPC)認可嘅賽事,部份智障項目今次亦有包括在內,好像噚日「靚仔二號」浚生奪得金牌嘅200米個人四式正是其中一個。



另一個係只為智障運動員而設嘅項目,所做出嘅成績唔會被IPC承認。



頒獎典禮嘅實況,要攞到獎牌,一定要攞到三甲位置兼且要贏一位(隊)對手先得,否則攞第一,但得一個人游都冇用。



今日仍然有獎牌進帳,其中Tony喺男子100米背泳以破香港紀錄成績奪冠,至於浚生喺另一組雖然起步失誤,但仍然以凌厲嘅後勁奪得銀牌。



至於棨麟同「靚仔三號」陳煒天喺男子100米自由式嘅情況......


睇過呢段片就知道。


呢次比賽嘅「大師姐」翠芬就出戰有中華台北選手屠若琳在場嘅100米蝶式,喺上次「環球運動會戰報」嘅時候都提及呢位選手嘅非凡實力,今次仲有片為證!(翠芬喺第3線,屠若琳喺第2線)



比賽完畢,臨走前影張大合照留念!

同佢哋道別之後,我就繼續我嘅旅程,而喺返池袋途中發生咗一段幾不愉快嘅事,究竟係乜嘢?下次再講!















3 則留言:

  1. Myspace Chistmas Comments & Graphics
    [版主回覆12/19/2009 22:58:00]歡迎到訪!超伯!聖誕快樂!

    回覆刪除
  2. 咁遠都黎捧場,香港隊隊員見到你一定好興奮啦!
    [版主回覆12/20/2009 12:48:00]仲好Supprise添!

    回覆刪除
  3. 班師弟師妹見到你好興奮wor
    [版主回覆12/25/2009 11:30:00]因為事前佢哋唔知道嘛!哈哈!

    回覆刪除