我與特奧會

2012年4月19日

沙公30周年校慶典禮 暨 表演晚會

還記得這些片段嗎?











光陰似箭,日月如梭,沙公25校慶後,不經不覺又5年!

人地話「十年人事幾番新」,但係沙公在這5年間已經變化很大,校長嘅改變、部份老師退休、學生人數越來越多、甚至係一啲以前仍然在沙公讀書嘅朋友,今日已經畢業成為校友,而自己亦由一個舊生嘅身份變成法團校董會校友校董。

今次校慶與5年前不同嘅是,時間由日間轉為夜晚,地點由學校轉為鄉議局大樓舉行。好多校友早喺兩三個月前問我有冇校慶消息,跟住個多月前校友們收到學校寄來的通告,之後佢哋都紛紛找我問如何交回通告給學校取入場券,頓時變咗佢哋的「代言人」。

兩個月前嘅沙公新春團拜,陳主任想找我幫他找一些有一直有聯絡的校友回來幫手,參與晚會其中一段演出《回到校園時》,回憶90年代沙公,我以校董的身份帶一班校友回學校,由我們申連加插各種表演,不過我那班「朋友」已經各有各忙,找到那些又不太適合,幸好找到後輩偉成、翠芬、安娜、國豪及焯嫣來協助,可惜嘅是翠芬和國豪後來要練習節奏樂環節,加上焯嫣忙於工作未能抽空訓練,所以一直保持有訓練的就只有我、偉成和安娜三人。

不過在晚會前四日,突然收到陳主任一個電話話偉成「失蹤」了,於是我又喺facebook、whatsapp同打電話俾佢,但都搵唔到佢,於是就叫焯嫣番嚟幫手,跟住叫埋我同安娜喺晚會前一日番學校做多一次綵排,雖然喺綵排當日,陳主任話已經搵到偉成,但都要夾埋場景變換時嘅應變台詞,以防有dead air嘅情況。

晚會舉行當日下午,雖然落起傾盆大雨,但無損參與演出同學嘅興奮心情,唯獨偉成喺呢個重要嘅時刻因工作關係未能參與演出,真係十分可惜。

我們用了整個下午做晚會採排,試試燈光,俾表演嘅同學、老師同家長們Mark吓位,踩踩台,練吓聲,試道具.......



正當同學採排之際,後台不同角落包括幾個化妝間同通道等都有老師、家長義工等為同學化妝、set頭、換戲服等,當晚老師同學們嗰啲「型爆頭」就係由家長義工幫手整架!

而最意外嘅係遇見校友何怡靜嘅妹妹,當佢認得出我嘅時候覺得喜出望外,原來佢喺5年前嘅校慶已經嚟幫手喇!不過怡靜已經喺03年「往天堂去」,無法再見到佢喇!



下午5時,我完成咗典禮司儀同表演部份之後就喺老師安排之下於VIP室食晚飯,入到VIP室就見到打扮成小昆蟲嘅小學班同學,見到佢哋未開始食飯,我都唔敢打開個飯盒,直至同學們叫「食飯」為止,老師叫啲同學食完飯先可以飲水,我又唔敢飲水,以免呢個身為「校董」嘅我俾同學一個「壞榜樣」。

食飯期間,有一位女同學開始出現情緒問題,喊著要出去見今日嚟睇佢表演嘅嫲嫲,要老師幫手控制佢嘅情緒。



食完飯後,我立即換上由學校準備嘅閃光片恤衫襯自己嘅黑色西褲,仲要以為自己冇帶黑襪,借左後台化妝間一對襪嚟著,但原來自己本身有帶黑襪嚟著!



換好衫後,我就返到會場,呢個時候,一個個由各團體贈送嘅花牌已送到嚟台前,而喺兩邊出口中間嘅校慶佈景板,亦有攝影師準備好為在場嘉賓同學影相,我哋都爭先喺嗰度影番張相!



晚上6點幾,校友陸陸續續嚟到會場,有啲好耐無見嘅校友例如俊業、家華、春明、國良、漢成等等亦難得嚟到見面,喺呢個咁難得嘅時刻,當然要影番張合照留念啦!跟住阿娟仲叫我哋拉大隊喺後面佈景板影相添!



跟住喺出面接待處,見到社工陳姑娘,佢竟然話我要同主禮嘉賓一齊入場!當堂O哂嘴,跟住話:「我今日係做司儀,一直都喺台上面喎,我唔駛同佢哋一齊入場架喎!」呢句話重覆講咗兩次左右,陳姑娘就call walkie問何校長,於是趁佢call緊校長時溜走,等佢肯定咗之後再回嚟,最後佢話唔駛跟入場,不過都要掛花同名牌加喺簽名板上留字。



接近典禮開始,嘉賓魚貫入場,我同劉小姐呢對「校慶司儀組合」開始不斷作「溫馨提示」、「節目預告」等等,仲要因為有主禮嘉賓走錯後門入場延遲咗典禮開始,於是我哋兩個走入化妝間休息同整理一下衣裝。

經過一輪擾攘後,典禮正式開始!

(由於部份無影相,一攞到相即分享)

首先係典禮部份,以往致詞部份都係「客套話」多,不需理會,但係今次由凌校董同主禮嘉賓教育局副秘書長葉太分別致詞十分用心,洋溢著溫暖嘅氣氛,十分有「人情味」,特別係葉太提到自己仲記得5年前校慶嘅日子、同學們喺2011年特奧夏季世界比賽嘅優秀成績、最後仲提到我嘅成就,我突然感到唔好意思,但葉太嘅勉勵說話對我有積極作用,我會好好記住!

接著係頒發「親子烹飪比賽」嘅獎項、30周年標語及標誌設計獎、各項長期服務獎俾服務超過10年以上嘅教職員同校董等,仲有由同學設計嘅紀念口致送俾主禮嘉賓,跟住係各位校董(包括我),喺何校長致謝詞後,整個典禮部份就順利完成,進入最精彩嘅表演部份。

表演開始前先觀看一段30周年10分鐘校慶短片,但呢段短片其實未完成,會連同呢個晚會嘅片段輯錄成為特輯,到時就可以再次回味!

而表演環節分為五部份,每一節都係環環相扣,十分有意思。




第一部份:粵劇「龍宮賀壽」- 以海底眾仙向海龍王賀壽為主題,帶出沙公30周年生日嘅歡樂氣氛。在場嘉賓睇住同學們又耍花槍又打關斗,不禁拍案叫絕!

第二部份:從前那座山 - 帶領觀眾回到50年代嘅沙田大圍,主角係十幾個著上可愛小昆蟲戲服嘅小學同學,分成兩排,前排喺台前向嘉賓握手,後台又有一班同學出場,然後一齊謝幕,雖然只有約1分鐘,但係對佢哋嚟講實在唔容易。

第三部份:暖暖校園 - 利用風趣幽默嘅戲劇方式,由一位同學擔當「講故佬」,講述剛剛開校時發生嘅集體發燒事件,重點有兩個,第一係由學生扮演嘅凌校董同何校長維肖維妙,係最大嘅笑位,「講故佬」訪問「真凌校董」時講笑話冇佢咁靚女,不過件事係真嘅。第二係由老師扮演新聞報導員片段十分逼真。呢個時候在場嘅校友們開始回億起當時嘅片段,咁就啱喇,跟住落嚟呢幕就係送俾啲校友回味嘅。

第四部份:回到校園時 - 由我、安娜同焯嫣三人以校友嘅身份趁沙公30周年校慶回到學校,我就以校董身份帶佢哋參觀,講述學校嘅變遷,由7段表演組成,內容十分生活化,包括節奏樂種子隊表演、體操、跆拳道、朗誦、英語會話、家長Rap Show同雜耍等,重點係我哋三個除咗要帶領在場嘅校友回憶開心片段外,仲要睇住台上嘅情況隨機應變,陳主任話冇一間學校好似我地咁講述生活片段嚟接表演,而整體表現係最好嘅一次,實在要感謝安娜同焯嫣嘅超班表現!



第五部份:飛躍大舞台 - 緊接著安娜最後嘅台詞「約咗班同學去睇飛躍大舞台」落台之後開始!亦係整晚嘅高潮!由沙公嘅三個傳統強項表演加上一場沙公明星Show組成,當然最重要嘅係「耀眼全場」嘅金牌司儀Marko!



第一個係近年嘅強項歌唱組表演,今年係李主任最後一年任教,睇到由她帶領歌唱隊表演已經進入倒數階段喇。


接著節奏樂組表演由四段樂曲選段組成嘅Music never ends,呢段表演有校友返嚟助陣,喻意「薪火相傳」,而家嘅節奏樂組由曲路到帶領風格都截然不同,唔知道幾時會恢復番由學生做指揮嘅傳統呢?



仲有展示視藝科同精英運動員學生嘅「沙公明星Show」,相當精彩嘅表演,呢個時候十分考驗Marko嘅能力,一字不漏地背哂啲台詞,跟住獨自睇住表演者嘅表演進度應變,難度滿分,連我呢個做讀稿嘅司儀都自愧不如!



最後由舞蹈組表演嘅現代舞「天使的盼望」,呢個時候我要返到後台準備謝幕,所以就喺後台睇表演,睇住佢哋專心一致又認真地表演,節奏明快嘅音樂下仲可以跳出具質素嘅舞步,色彩豐富,佳作!(有啲似學校舞蹈節評語XD)。



沙公30周年校慶終於都曲終人散喇!
呢場表演晚會,可以好肯定咁講係有史以嚟「最完美」嘅一次演出!
老師們默默耕耘,家長們喺背後無私奉獻,師弟師妹們既認真又專業嘅演出,已經深深感動到我同今日到場嘅校友們!
雖然今日我因為自己係校友校董而獲贈紀念品,但我覺得呢份紀念品係屬於每一位參與演出,台前幕後的沙公朋友!
我能夠參與其中,感到十分榮幸!我以你們為榮!

2 則留言:

  1. 三十年的歷史,孕育了很多很多同學,當中讓人感動非常,在現場一定更加感受深刻,非筆墨所能形容!
    [版主回覆04/25/2012 22:56:10]老實講,我都好耐無試過咁開心喇!

    回覆刪除
  2. 我一直都很敬重運動員,因為比賽背後,一定要付出很大的努力、汗水。
    而當中的辛酸、失望,若不是運動員是無沒法體會到。
    同樣地,比賽所帶來的喜悅、喜笑亦非筆墨能形容。

    謝謝你寫這個blog令我回想當日我training的日子!

    做一位運動員,難;做一位要應付身體上障礙的運動員,更難。
    不過,也是值得的!!

    下次你見到運動員(唔知你會唔會帶隊呢?),都說聲「加油」吧!

    回覆刪除