我與特奧會

2012年12月27日

我與老媽子的2012聖誕澳門兩日hea遊 (上)

因為今年沒有任何海外活動,所以到年底前仍有幾日年假未清,於是就一次過攞哂啲年假用來去外遊之用,原本想喺聖誕前後攞3-4日同老媽子去台灣玩,不過因為套票價錢太貴打消咗念頭,於是轉為澳門短程遊,皇天不負有心人,喺一個專做旅遊啲團購網站中搵到聖誕澳門金都酒店連金光飛航船票,仲送快富街美食券同遊覽巴士券,兩人套票加埋都只係2000蚊多啲,算係好抵!

最近老豆身體狀況日漸轉差,好多嘢都要我哋服侍,有時佢啲「硬頸」性格都令我哋透不過氣來,特別係老媽子,所以今次旅遊嘅目的只係為咗散心hea吓,暫時避開繁瑣嘅事。




我哋坐中午12點嘅船前往澳門氹仔碼頭,大約1點鐘左右到達,入境後我哋去坐穿梭巴士前往金都酒店,不過只有我哋兩個上車,因為大多數都係跟旅行社入住,散客並唔多。



到達酒店check-in後,我哋就可以入房喇!訂購時團購網負責人話冇乜單人床嘅房,但係為咗我同阿媽可以瞓得舒服啲,就同佢講話盡量要兩張單人床房,原本都打定輸數,但個接待處嘅人話係我哋係入住單人床房間,都覺得有啲喜出望外。



房間寬敞整潔,一般嘅設備都係有嘅。





廁所分浴缸同花洒兩邊,啱哂只係沖花洒嘅我哋。



我哋住嗰間房只係對著個地盤,斜對面見到銀河酒店。



所以冇乜景觀可言,不過下次再嚟嘅時候又會變成點呢?



小休過後,我哋決定去澳門半島嗰邊行吓,順便去試吓其中一間出名嘅瑪嘉烈餅店出爐葡撻。

呢間酒店位置偏僻,只有的士同專車可以去到澳門半島嗰邊,如果搭專車嘅話就要去港澳碼頭再轉往其他酒店專車,由於瑪嘉烈餅店近葡京酒店,所以就坐佢哋嘅專車前往。

老媽子話市中心啲邊經常都塞車,車多到郁都郁唔到,上次佢同老豆去澳門時都係咁,今日嚟到新葡京酒店門口時都塞咗一陣。



喺新葡京酒店,旅客特別多,大多數都係內地客。



至於我哋今日嘅目標 - 瑪嘉烈餅店就喺酒店後面,六福珠寶隔離條巷仔裏面,兩年前我同HKSAM啲委員去澳門seminar嘅時候入住葡京酒店時都冇發現到。



見到呢個牌就入去。



去到舖頭前面,見到好多人喺到排隊,有啲就買麵包西餅,而更多嘅人就為咗一嘗美味嘅葡撻。



因為正值下午茶時間,所以除咗葡撻店外,隔離嘅麵店、糖水舖等都好多人嚟幫襯。



至於隔離巷啲食店就水靜鵝飛。



今日嘅主角 - 瑪嘉烈餅店出爐葡撻,件件蛋撻涵飽滿,奶味濃,皮脆又不油膩,好食!

食完好味嘅葡撻,就去大三巴、議事亭前地嗰邊行吓,影吓相。



原本可以好快去到,但係我哋行咗好多冤枉路,不過唔緊要,反正都係hea遊,唔係都見唔到呢間美心餅店仲用緊舊招牌。





又見到呢啲舊式建築。



行咗咁耐,終於都到咗議事亭前地,皆因今日係平安夜,有好多人喺度參觀,又有好多大型節目。



市面掛滿聖誕燈飾,充滿聖誕氣氛。



前往大三巴前面嘅街巷都有好多手信舖,人來人往。



到咗目的地大三巴,當然要影相留念喇!



除咗議事亭前地外,呢度都舉行平安夜活動,老媽子同我影相時,節目剛剛開始,一時間俾啲音響嚇親。



原本我想去食啲特色葡國菜,不過老媽子就只係想早啲食完嘢返去,就去咗呢個指示牌上面嗰間緬甸食店食飯。



我叫咗支豆漿



同埋所謂嘅椰汁牛腩飯,味道OK喇,但係太膩。



老媽子就叫咗杯咖啡同埋咖哩雞加薄餅,都係太膩。

不過呢餐係求其食,飽肚就夠。

食完之後,我哋就坐的士返酒店,全程都只係大約60蚊左右,唔算太貴。

今日嘅旅程就結束喇!

請Like我!

1 則留言:

  1. 澳門好似又21歲先可以入賭場,雖然冇能力冇興趣賭,但係賭場外等朋友家人真係好慘:-)

    回覆刪除