我與特奧會

2016年7月28日

集思廣益:殘奧打氣團如何運作?


2016里約熱內盧殘奧會將於9月7日至18日舉行,香港隊一共派出24名運動員出戰8個項目,國際殘奧會將提供網上直播給支持者收看。正所謂「獨樂樂,不如眾樂樂」,4年一度嘅盛事當然係約埋大家一齊睇直播啦。

發表者簡介:
  1. 前香港智障游泳代表隊,曾出戰2002遠南運動會(亞殘運前身)、特殊奧林匹克夏季世界比賽等大型國際賽事。
  2. 退役後積極推廣智障人士體育運動,先後擔任國際特殊奧林匹克全球信使、香港特殊奧運會運動員總監、國際特奧東亞區高級顧問委員會委員等職務。
  3. 由運動員時期至今已參與智障人士體育運動及相關義務工作超過20年,為了讓市民大眾更能認識智障人士的生活及支持智障運動員,於2006年開設「全球使者部落 (IGM Blog)」。
計劃:約埋一齊睇殘奧直播,喺比賽開始前10分鐘用facebook現場直播功能紀錄我哋睇殘奧直播為香港隊打氣嘅情況。

目標:
  1. 為2016里約殘奧會香港代表團打氣!
  2. 證明香港市民係好重視殘疾運動員,認同香港嘅電視台係有條件直播殘奧。
  3. 集合香港市民的力量,要求政府改善殘疾人士政策,包括殘疾運動項目的支援、改善無障礙設施、推行殘疾人士就業配額制、改善傷殘津貼政策……等。
殘奧打氣團運作等級:

Level 1 – 只會喺有「智障組別」項目嘅日子約我相熟嘅朋友支持出戰殘奧嘅香港智障運動員。
Level 2 – 邀請有興趣嘅朋友一齊睇部份有香港隊出戰嘅項目。
Level 3 – 公開邀請香港市民一齊睇所有香港隊出戰嘅項目。
Level 4 – 收看香港隊出戰項目及香港殘奧會有發展嘅項目,並邀請殘疾運動項目專家旁述及講解。
Level 5 – 於大型場地(如大球場、商場等)收看殘奧直播,並於直播開始前設殘疾項目體驗供公眾試玩。

基本設備:配備wifi接收功能嘅電腦、附有facebook直播功能嘅手提電腦/手機/ipad…

需要解決嘅問題:
  1. 場地:必須設有wifi或Lan線上網設備嘅場所,並且要有插頭同拖板確保有足夠嘅電源供應,而且該場地必須要准許長期佔用,暫時只係諗到麥當勞、Starbucks、酒吧等公眾場所。(唔會考慮自己 / 朋友屋企,以免擾人清夢)

  1. 時差:以殘奧會游泳及乒乓球項目為例(附圖1及2),游泳智障組項目 (S14級別)會喺當地時間9月8、11、14及17日舉行,而智障組乒乓球單打(TT11級別)如無意外會喺當地時間9月8-12日舉行,早上嘅比賽時間為上午9時至下午2時30分左右,下午賽事為下午5時30分至晚上10時左右,巴西里約熱內盧俾香港慢11個鐘 (冬令時間),即是說部份項目要喺香港時間凌晨至早上呢段時間舉行,對需要返工返學嘅朋友係極不利,雖然話有好多體育迷會為咗睇嗰場賽事會冒著不夠精神返工嘅風險去睇直播。
總結:殘奧會係繼奧運會後,另一國際性精英賽事,而且近期世界各國投放喺殘奧項目嘅資源越嚟越多,競賽水平亦越嚟越高,好希望透過呢次活動能夠團結香港人(就好似喺世界盃外圍賽期間支持香港足球隊一樣),如果唔把握呢個咁好嘅機會,就要等多4年喇!


如果有任何意見,歡迎各位表達你嘅想法。

原文:

沒有留言:

張貼留言